ភ្នំពេញ៖ រយៈពេលពេញមួយសប្ដាហ៍ចាប់ពីថ្ងៃទី១៩ ដល់ថ្ងៃទី២៥ ខែកុម្ភៈ ឆ្នាំ២០២៤ សមត្ថកិច្ចនគរបាលជាតិ បានឃាត់ខ្លួនក្មេងទំនើងសរុបចំនួន ៤០នាក់ ក្នុងកណីដែលបានកើតឡើងចំនួន ៤០ករណី។ នេះបើតាមលោក ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ។
លោក ទូច សុឃៈ បានឱ្យដឹងថាកាលពីសប្ដាហ៍មុន សមត្ថកិច្ចបានបង្ក្រាបករណីក្មេងទំនើងចំនួន ២២ករណី និងបានឃាត់ខ្លួនក្មេងទំនើងចំនួន ៥០នាក់។ លោកបន្ថែមថា ក្នុងរយៈពេលចុងក្រោយនេះ ករណីក្មេងទំនើងនៅតាមមូលដ្ឋានបានថយចុះគួរឱ្យកត់សម្គាល់។
លោកបានលើកឡើងថា ប្រមុខក្រសួងមហាផ្ទៃកម្ពុជា លោក ស សុខា បានដៅយកការដោះស្រាយបញ្ហាក្មេងទំនើងក្នុងសង្គមជាការងារអាទិភាពដែលត្រូវយកចិត្តទុកដាក់អនុវត្តចាប់ពីដើមនីតិកាលទី៧នេះ ខណៈការងារនេះ បានដើរប្រទាក់ក្រឡាគ្នានិងការប្រយុទ្ធប្រឆាំងគ្រឿងញៀនខុសច្បាប់។
អ្នកនាំពាក្យរងក្រសួងមហាផ្ទៃ បានអំពាវនាវដល់មាតាបិតា និងអាណាព្យាបាលទាំងអស់ យកចិត្តទុក ដាក់អប់រំសីលធម៌ សុជីវធម៌ និងគុណធម៌ដល់កូនចៅឱ្យបានជាប្រចាំ ហើយយុវជនទាំងអស់ត្រូវ ចៀសឱ្យឆ្ងាយពីគ្រឿងញៀន និងត្រូវចូលរួមផ្សព្វផ្សាយគ្រោះថ្នាក់នៃគ្រឿងញៀនឱ្យបានទូលំទូលាយ៕
